济公（粤语版）全剧本.doc

（众仙纷至沓来，齐聚凌霄宝殿）众仙：参见玉帝！玉帝：众卿家，大发雷霆，所为何事？（手指王母）王母，你讲先？王母：玉帝，降龙罗汉将我樖蟠桃树嗰啲仙桃冚棒冷偷晒畀牛郎嗰啲牛食呀！某神仙：嘿！点止呀？佢重串通啲喜鹊日日搭条鹊桥俾牛郎织女幽会。仆街喇，已经屙咗成窦仔女出嚟喇！月老：玉帝，下便凡间啲男女关系应该由我管开嘅，点知佢嚟到搞乱档摊，搞到皇帝走去追只鸡，堂堂一个公主要同乞儿私奔。二郎神：我话佢两句咋嘛，个衰人就偷咗我只啸天犬去炆枝竹啰。玉帝：你係边鬼个呀？二郎神：在下二郎神嗱。玉帝，（摊开掌心）我只眼都係俾个衰人毒盲埋嘅。呢只都係啸天犬嘅老替嚟啫。财神：国有国法，天有天条，呢个降龙目无王法，我希望玉帝批准我喐佢。玉帝：财神，你唔使咁冲动。阎王：嘿，呢啲算小事啊！佢挞咗我本生死册，改到乱晒坑，凡间十八年嚟都未死过人。搞到仵作佬冇得捞。重搞咗五六百岁人魔出嚟。玉帝 ，呢坛嘢你搞唔掂佢，我阎王一于告上九重天，玩大佢为止。玉帝：人嚟，马上同我捉降龙上殿。（伏虎俾掹咗上嚟）伏虎：使唔使咁大力咖？瞓紧晏觉吖嘛，大佬！啊……，乜咁人齐呀，各位？众仙：咩呀？你边係降龙？你係伏虎咋嘛。伏虎：一样啫，降龙伏虎一样之嘛。玉帝：伏虎！伏虎：啊！玉帝！玉帝：又唔关你事，你做咩上嚟呀？伏虎：我咪代表降龙嚟同大家道个歉啰吓。王母：你咁有义气，恐怕你都有份嗱。伏虎：喂！边关我事呢？我……降龙：超！神仙大晒咩？（喺伏虎面前停低，手揸砵）伏虎，你硬係多事干嘅。不过做兄弟都算几够雷，心领嘞。伏虎：多谢！多谢！喂，家吓噉嘅情况求祈认句错咪“young”啰。灶君：认句错就想“young”呀？降龙、伏虎（同声同气）：我哋两兄弟讲嘢，几时轮到你插嘴呀？降龙：你个灶君，逢年尾喺下便揾着数，人哋畀唔够你你就上嚟唱衰人哋系咪？插佢！灶君：喂，啱啱插完重好痛，又插？王母：区区一个罗汉，咩事你都要理过，岂有此理，你偷咗我蟠桃你好赔嘞噃。降龙：王母，分啲畀人冇乜大不了呀。你年年生日喫蟠桃都喫到腬啦，今年转吓口味喫条蕉呀！（二郎神只狗吠，降龙转身）降龙：咩呀？条气唔顺当面同我讲，唔好揾只狗吠吠贡，咪以为换咗斑点，我照噍，讲你听呀。到边个？伏虎：到边个？（指月老）就系你喇！降龙（埋嚟）：你呢个月老，恃住有几条红线就将下便啲凡人玩到谢！好似嗰个梁山伯同祝英台噉咋嘛，你做咩係都唔肯将人绑埋一齐啫，搞 到人撞晒坟呕晒血噉呀，人哋咩对你唔住吖？你老嘞，你好退休啦，唔係啲红绳迟啲呀实绑到乱晒龙，就搞到呢，男同男、女同女，再搞落去 呢就人同猪，曱甴同牛，噉你话喇？伏虎：最惨就莲藕同石头啊。降龙：插佢！伏虎：插佢！阎王：人哋几呀岁，咪掐得掐噃。降龙：做架粱呀，阎罗王你？伏虎：插佢！降龙：哎！唔好下下话插，家吓我哋係讲道理嘅。（对阎王）点解下便凡间有个女人，生咗十六个女，你都唔肯畀个仔人哋，点解？搞到个女 人终于睇唔开，跳海自尽，落到下边，佢都重要话人哋係枉死，将人抌咗落个油镬嗰度炸到好似个咸煎饼噉样。啊！你话天理何在呀？（晕）伏虎：降龙，降龙……玉帝：晕就得架喇？人嘅命运，一早已成定数，并无不妥，几时轮到你无理取闹呀？我哋只係照例执行啫。伏虎：玉帝……降龙（醒返）：咩照例执行呀？边个定嘅例呀？边个够胆一定话啱架？正所谓天外有天，玉帝你定嘅嘢若然俾九重天嘅普萨听到，怕且觉得白 痴兼搞笑喎。财神（挺身而出）：太过分嘞。玉帝，各位仙友，本人觉得降龙罗汉实在太嚣张，我财神为咗顾全大局，请玉帝批准我同佢只抽。（众仙大笑）玉帝：收嗲！你收嗲喇！财神：我要同佢只抽！月老：吓死人咩？财神：我要同佢死过！我唔会放过你架！伏虎：吓得我吖！玉帝：听住！就算天条几咁唔啱，总有一条可以定你嘅罪，押佢两个落去凡间，一个做猪，一个做狗，十世不得轮回！降龙：咪住先！玉帝：咩事呀？降龙：你话做就做呀？玉帝：我话做就做啰。降龙：噉我够话你做曱甴，一齐呀！玉帝：哎吖！拉佢两个落去！降龙：咩呀？伏虎：咪住！唔好乱嚟！唔好乱嚟！（观音大士出场）众仙：参见大士！观音：玉帝，我哋每一位成仙至今，少说亦有一万几千年。世情种种，凡间一切，对我哋嚟讲，係遥远而微不足道架。今日俾降龙罗汉噉闹一闹，或者係一个机缘。何不借呢一个机缘嚟了解吓凡人重係咪咁愚昧无知抑或有所进步。降龙：听观音大士讲嘢，真係听出耳油！伏虎：舒服！舒服！阎王：大士，呢个小主借住为人间报不平为借口，以下犯上啫。伏虎：你唔好乱讲呀，阎罗王！降龙：哎！大士自有分数嘅。观音：降龙，你做咁多嘢，目的何在呀？降龙（清清喉咙）：我只係想呢班自以为高高在上嘅神仙能够真真正正噉体验一下啲凡人，因为佢哋一世人只得区区几呀年命，唔好因为做咗 一两次错事就翻